ILOILO CITY – Plano ni presumptive vice president Davao City Mayor Sara Duterte-Carpio nga mag-take oath bilang ika-15 nga bise presidente sang Pilipinas sa Hunyo 19 sa iya hometown sa Davao City.
Ini agud nga makatambong siya sang oath-taking sang iya running mate nga si presumptive president former Sen. Ferdinand “Bongbong” Marcos, Jr. bilang ika-17 nga presidente sang Pilipinas.
Ang mga bag-o nga set sang mga lideres ang magasugod sang ila opisina sa udto sang Hunyo 30.
Suno kay Duterte-Carpio, sa tion nga ma-proclaim na ang isa ka winning candidate, mahimo na nga magpatigayon sang inagurasyon sa bisan ano nga tion.
Na-set na ang petsa apang wala pa naplanuhan ang mahimo nga matabo bangud wala pa sang pinal nga petsa sang proklamasyon.
Mahimo man nga maglapaw sa Hunyo 19 ang inagurasyon.
Ang anak ni Presidente Rodrigo Duterte ang magabulos kay Vice President Leni Robredo nga napyerde naman ni Marcos sa presidential race.
Suno kay Duterte-Carpio, madamo sang Davaoeños nga gusto nga mag-witness sang iya inagurasyon bilang ikaduha sa pinakamataas nga opisyal sang pungsod.
Siya ang nagserbe bilang Davao City mayor sa tatlo ka termino humalin sang 2010.
Sang ginpamangkot naman ini kun ginpanginbulahan na ini sang iya amay, suno sa iya, wala na sila naka-istoryahanay humalin sang August 2021.
Apang suno sa iya, nagalaum ini nga magkit-anay gid sila sa labing madali nga panahon.
