Ginapaeksplekar sang chairman sang Committee on Engineering and Public Works ang City Engineer’s Office parte sa mga materyales nga gingamit sa kontrobersyal nga proyekto sang overpass sa Diversion Road, Mandurriao kag waiting shed sa Katilingban, Molo.
Ini nga mga proyekto ginpasuni nga overpriced, rason nga ginapaimbestigar sang konseho kag ginapareview sang alkalde.
Sa interview sang Bombo Radyo kay Councilor Johnny Young, iya ginpahayag nga nagpadala na sila sang inquiry sa City Engineer’s Office kag nagahulat sang sabat parte sa status sang proyekto.
Suno sa iya, ila man i-update ang publiko kun ano ang natabo, pila ang cost sang proyekto, ano ang scope of work, kag ano nga mga materyales ang gingamit.
Ginpabutyag man niya nga indi siya contractor ukon engineer, gani indi siya makahatag sang konklusyon kon overpriced guid ang presyo.
Matandaan nga nagabalor 4.1-million pesos ang ‘roofing kag improvement’ sang overpass sa Diversion Road, Mandurriao.
Base sa dokumento sang proyekto, ang scope of works sang overpass nagalakip sang temporary facilities, electrical system, signages, security, kag enclosure sang site nga may kantidad nga P280,600.00.
May yara man sang Construction Safety and Health Program nga nagabalor P195,200.00, scaffolding kag safety precaution nga P461,763.90, roof kag roof framing upod ang painting works nga P1,418,170.70, steel works nga P659,044.00, tile works nga P412,689.40, repainting sang existing steel railings nga P137,506.20, plumbing kag sanitary lines nga P100,723.20, kag electrical works para sa LED lights nga P450,000.00; para sa improvement sang overpass sa Diversion.
Padayon pa ang paghulat sang sabat halin sa City Engineer’s Office kag ang pagreview sang mga opisyal sang syudad agud masiguro nga husto kag patas ang paggamit sang pondo sang gobyerno lokal.
