Ginpaathag sang Department of Agriculture (DA) nga magapabilin nga mataas ang presyo sang bugas sa Pilipinas sa una nga anum ka bulan subong nga tuig bangud sa epekto sang El Niño phenomenon sa sektor sang agrikultura sa pungsod.
Suno kay DA Secretary Francisco Tiu Laurel Jr., ang presyo subong sang bugas ang nagatupa sa P47 tubtub P57 kada kilo.
Estable ini suno sa tiglikom kag ginalauman nga maganubo ini sa second half sang 2024.
Gindugang man sini nga nakabakal na ang National Food Authority (NFA) sang buffer stocks apisar pa sang kumpetisyon sa traders nga nagabakal sang palay sa presyo nga P27-31.
Ang buying price naman sang NFA sa palay ang nagatupa sa P23.
Pahayag pa ni Laurel, nagapanagtag man ang ahensya sang fertilizers kag binhi para sa mga kararuton nga wala man nagakinahanglan gid sang madamo nga suplay sang tubig.
Nahibaluan nga sa Abril 1 nga bulletin sang DA, ang balor sang kahalitan nga ginbilin sang El Niño phenomenon sa sektor sang agrikultura ang nagsaka na sa P2.63 billion kun sa diin masobra 54,200 ka mangunguma ang naisip nga apektado.
Partikular ini nga nakit-an sa 10 ka mga rehiyon nga amo ang Cordillera Administrative Region, Ilocos Region, Cagayan Valley, Central Luzon, Calabarzon, MIMAROPA, Bicol Region, Western Visayas, Zamboanga Peninsula kag Soccsksargen.#
