Ginalauman nga magataas man ang pesyo sa bugas sa mercado kasunod sa nagapadayon nga pagtaas sang mga produktong petrolyo.
Sa interview sang Bombo Radyo kay Melvi Patingan, vendor sang bugas sa Iloilo Central Market, iya ginpahayag nga amat-amat na nga mabatyagan ang pagtaas sang presyo sang bugas.
Suno kay Patingan, may pagtaas subong sang duha ka pesos kada kilo sang bugas pareho sang Local Rice kun sa diin naglab-ot na ini sa P44 subong kun ikumpara sa P42 sang nagligad.
Pahayag niya, ang ila ginabaligya sa karun amo ang mga supply nga ila ginbakal pa sang naligad nga semana rason nga indi pa tama ka mabatyagan ang pagtaas sang presyo sang bugas.
Apang, ginpahayag niya nga dako pa gid ang posibilidad sang pagtaas sang presyo sa masunod bangud nga mismo supplier nagpahayag sang dugang sang presyo kun sa diin posible nga magasaka na sa 50 pesos per 25 kilogram ang bugas.
Ginpahayag niya, magapataas man sila sang presyo sa merkado bangud nga apektado man sila nga mga manug baligya sa global crisis nga ginaatubang sang tanan.
