ILOILO CITY- Mahimo nga magtaas pa gid sa masunod nga mga inadlaw ang presyo sang itlog matapos ang isa ka semana nga may ginpatuman man nga price increase sa amo nga poultry product.
Sa interview sang Bombo Radyo kay Ian Adonia, Sales Manager sang isa ka local producer kag distributor itlog sa Panay, iya ginpahayag nga sang nagligad pa nga semana sila nagpasaka sang presyo sang itlog bangud sa pagtaas man sa presyo sang components sang feeds sa manok.
Suno kay Adonia, 20 centavos tubtob 40 centavos kada bilog ang ila ginpatuman nga price increase.
Pahayag niya, nakadepende na sa mga retailers sang itlog kun pila ang ila idugang sa presyo sang itlog.
Dugang niya, kun magtaas pa gid ang presyo sang components sang feeds, posible nga magpamahal sila liwat sa presyuhanay.
Una na nga nagpaandam ang grupo nga Agricultural Sector Alliance of the Philippines Inc. (AGAP) sa posibilidad nga maghampak ang presyo sang itlog sa P10 tubtob P15 bangud sa pagtimbuok sang production cost kag kaso sang bird flu sa mga manok.
Sa paglibot naman sang Bombo News Team sa mga merkado publiko sa syudad, nagsaka sang 50 tubtob 75 sentimos ang presyo sang itlog kada isa.
