Ginklaro sang LPG Marketers Association sa publiko nga wala nila ginalantaw nga kulangon ang suplay sang liquefied petroleum gas (LPG) sa pungsod sa masunod nga mga binulan, apang may ginaantisipar lang nga pagpanglakaak sa presyo.
Ini apisar sang nauna nga estimate sang Department of Energy (DOE) nga magalawig na lang sang 24 ka adlaw ang suplay sang LPG as of March 20.
Suno naman kay Arnel Ty, founder sang LPGMA, sa ila updated data, gina-project nga makalawig pa sang 35 tubtub 45 ka adlaw ang suplay nga may improvement ipaanggid sa data nga ginpresentar sang ahensya.
Pahayag pa sini, ginmanduan ang industriya nga mag-procure sang available nga LPG supply sa market kasunod sang ila meeting kay Energy Secretary Sharon Garin.
Wala sang ginaantisipar nga shortage suno kay Ty bangud padayon man ang pagbakal sang pribado nga sektor kag naga-umpisa naman ang government-to-government sourcing arrangements.
Apang kun may malain man nga balita, ini amo ang pagpanglakaak sang presyo bangud sang pagsaka man sang shipping costs.
Ginalantaw sang grupo nga magalab-ot sa P1,400 tubtub P1,500 ang presyo sang kada tangke sa Abril.
Ginbasehan sang grupo ang nagsaka man nga balayran sa barko bangud sa paglain sang mga ruta sa Middle East bangud sang gyera, rason nga nagalayo ang alagyan via United States, Africa, Canada, kag Australia.
Una na nga ginpahayag sang DOE sa Senate hearing nga hugot ang ila monitoring sa LPG. Lakip sa ila ginahimo amo ang paglibot sa mga restaurant kag beverages agud nga maabisuhan sila nga mapahagan-hagan anay ang paggamit ukon konsumo tubtub nga mag-abot ang dugang nga mga suplay.
