Nakit-an na ang pagnubo sa presyo sang karne sang baboy sa pila ka mga mercado sa pungsod sa tunga sang pagbalik sang outbreak sang African Swine Fever (ASF) sa pila ka mga probinsya.
Sa monitoring sang Department of Agriculture (DA), ang presyo sang liempo ang yara sa P305 per kilogram samtang ang kasim ang nabuhinan sang P10 ang presyo per kilogram.
Sa pihak nga bahin, nagpasaka sang presyo ang retailers sang mga manok kag itlog bangud nagapangita subong ang consumers sang alternatibo nga sources sang protein.
Ini bangud nahangawa man sila sa ikaayong lawas sang pamilya kun magkaon sang karne sang baboy gani madamo sa mga customer ang nagapangita subong sang chicken kag beef.
Nahibaluan nga daku nga halit ang natuga sang ASF outbreak sa national hog population nga nagnubo halin sa 12.7 million sang 2019 pa- 9.9 million sa katapusan ang 2023.
Suno sa Bureau of Animal Industry, naglapta ang ASF sa 17 regions sa Pilipinas kag apektado ang 74 provinces.
As of August 8, 64 ka mga banwa sa 22 provinces ang nag-report nga may active ASF cases apang una na nga ginpasalig sang DA nga ang infected pork products ang indi na makalab-ot sa mercado bangud istrikto ang pagbantay sang National Meat Inspection Service.
