Naga-guwa sa report sang Department of Agriculture (DA) nga mas ginapili sang consumers nga baklon ang imported nga mga ahos bangud mas barato pa ini ipaanggid sa local supply.
Sandig sa pinakaulihi nga market monitoring, ginpahayag sang ahensya nga ang imported garlic ang ginabaligya sa P80 kada kilo nga indi hamak nga mas manubo sa local garlic nga yara sa P300 per kilo ang presyo.
Ginpahayag pa sang DA nga ginapili lang sang mga manugbakal nga mangin practical ukon mas makatipid apisar nga mas mabaskog kuntani ang aroma kag flavor sang locally produced nga mga ahos ipaanggid sa imported.
Sa amo man nga report, ginpaathag sang agriculture department nga nagnubo ang local stock bangud halos naubos na ang suplay nga para sang nagligad nga tuig bangud sang serye sang holidays sang Disyembre.
Ang ahos nga ginabaligya sa Enero 2023 ang nakuha pa sang katapusan nga harvest sang 2022 nga natabo sa bulan sang Nobyembre.
Sa Ilocos naman kuhaon ang una nga harvest sa 2023 sa bulan pa sang Pebrero kun sa diin ang projected volume ang yara sa 21 metric tons.
Lauman nga may 3,947 MT nga mangin available para sa consumers sa Abril nga magahalin naman sa 22 ka garlic-producing towns sa Ilocos Region.
