Ginapanan-aw nga magasaka ang presyo sang liquefied petroleum gas (LPG) sa imbukada sang 2024.
Ini kun basehan ang abiso sang shipping firms sa customers sa Pilipinas nga may dugang nga gasto nga $60 ukon P3,300 kada metric ton. Katumbas ini sang price hike nga P3.50 per kilo ukon P38.50 sa kada 11-kilogram nga tangke.
Ini nga saka sa presyo ang maangot sa problema sa Panama kag Suez Canals nga nagresulta sa pagbuhin sang byahe sang mga barko kag dugang nga gasto kag fuel consumption bangud nagaagi sila sa mas malayo nga mga ruta.
Ang sitwasyon sa Red Sea ang ginalantaw man nga may labot sa pagsaka sang shipping fees.
Wala pa subong sang ginpaguwa nga alert kaangot sa price increase apang may yara sang dealers nga naga-abiso na sa mga consumers nga magbakal na antes ang Bag-ong Tuig.
