Magataas ang balayran para sa liquefied petroleum gas (LPG) products epektibo subong nga adlaw, Hulyo 1.
Suno sa Petron Corporation, may saka sa presyo nga P0.55 per kilogram halin 12:01 a.m. kaina sang kaagahon.
Matandaan nga sang nagligad nga bulan, may ginpatuman nga rollback ang amo nga kumpaniya nga P6.20 per kilogram para sa household LPG.
Suno kay Regasco president Arnel Ty, president sang LPG Marketers Association, ang mayor nga rason para sa pagsaka sa presyo amo man ang kinagamo sa Middle East nga ginakahangaw-an sang international market bangud sa posible nga supply disruptions.
Nagpahanumdom man ang industriya sa mga konsumidor nga islan na sang bag-o ang dilapidated LPG cylinders bangud nagahilapit na ang deadline para sa confiscation sang substandard tanks. Ang dilapidated ukon substandard nga tangke sang LPG ang nagalakip sang mga wala sang visible brand kag permanent marking kag puno na sang tuktok.
Suno kay Ty, mahimo bayluhan ini nga mga tangke sa pinakamalapit nga dealer nga wala na sang kinahanglan bayaran.
Nahibaluan nga sa idalom sang layi, ang dilapidated kag indi safe nga tangke ang mahimo kumpiskaron epektibo sa Oktubre subong nga tuig nga tatlo ka tuig matapos nangin epektibo ang LPG Industry Regulations Act.
