Nagsaka ang presyo sang pila ka mga noche buena items sa Western Visayas, ini suno man sa ginpagwa nga Price Guide sang Department of Trade and Industry (DTI).
Sa interview sang Bombo Radyo kay Atty. Jazer P. Miranda, Officer-in-Charge sang Consumer Protection Division sang DTI, iya ginpahayag nga sa 236 ka mga Stock Keeping Units halin sa 22 ka mga manufacturers, 104 diri ang nagsaka ang presyo lakip na diri ang pasta kag meat products.
Nagapanguna nga rason sang pagsaka sang presyo sang pila ka mga noche buena products amo ang pagmahal sang raw materials kapareho sang karne, rason nga may pagtaas sang presyo sang hamon. Subong man ang pagsaka sang presyo sa harina nga nakaapekto sa presyo sang pasta products.
Dugang pa, dako man ang kontribusyon sa labor costs sa rehiyon, packaging, logistics, kag manpower.
Samtang, 13 naman ka mga Noche Buena products ang nagbarato ang presyo, kag 121 ka produkto ang wala sang paghulag sang presyo humalin sang nakaligad nga tuig kapareho sang lain nga brand sang ham, fruit cocktail, queso de bola, sandwich spread, cheese, spaghetti sauce, tomato sauce kag all purpose cream.
Ang presyo sang ham ang nagabalor halin sa P170 tubtob 928.50;Queso de bola nga halin sa P210 tubtob 445; Fruit Cocktail nga halin sa P61.76 tbtob 302.50; Cheese nga halin 56.50 tubtob 310; Mayonnaise ngahalin sa P20.40 tubtob 245.85; All Purpose Cream nga halin sa P36.50 tubtob P72; Sanwich Spread nga P27 tubtob P236.60; Pasta/Spaghetti nga halin sa P32 tubtob P114; Elbow Macaroni nga halin sa P36.50 tubtob P126.25, kag spaghetti sauce nga halin sa P28.50 tubtob P103
May 13 naman ka Stock Keeping Units ang may pagnubo sang presyo lakip na diri ang pila ka brands sang mayonnaise, pasta, elbow macaroni, kag all-purpose cream.
Ang price guide nga ginpagwa sang DTI ang epektibo tubtob Disyembre 31, 2024.
Nag-abiso man ang DTI ang tsekyaron sang mga konsumidor ang expiration dates agud mapasiguro ang quality sang mga produkto kag ginakosiderar ang tingob nga pagbakal agud maka-save ang mga ini.
