ILOILO CITY- Ginaduso sang bakers association ang pagpataas sang presyo sang regular pandesal sa tunga sang pagmahal sang presyo sang raw materials.
Suno kay Asosayon ng Panaderong Pilipino Director Princess Lunar, gikan sa regular nga P2.00 kada isa, himuon ini nga P3.00 tubtob P4.00.
Pahayag ni Lunar,kun indi mapataasan ang presyo sang pandesal, madamo sang mga panaderya ang magasirado na lang.
Dugang ni Lunar, sa subong, ang presyo sang isa ka sako sang harina ang yara na subong sa P1,200 – P1,300 gikan sa P1,000 sang Enero.
Magluwas sa harina, nagsaka man ang presyo sang sako sang kalamay, asin, yeast,kag mantika nga ginagamit sa paghimo sang tinapay.
Sa Iloilo City, wala pa sang pagbag-o sa presyo sang pandesal apang may pagtaas na sa presyo sang iban nga produkto nga ginagamitan sang harina.
Sa interview sang Bombo Radyo kay Jona Pabrigas, nagabantay sang bakery, iya ginpahayag nga nagtaas ang presyo sang cakes kag pastry bangud nagtimbuok man ang presyo sang ingredients kaangay sang gatas kag itlog.
