ILOILO CITY – Pagkatapos sang sunud-sunod nga rollback, lauman sang mga motorista ang big-time nga price increase sa produktong petrolyo sa masunod nga sema suno sa Department of Energy (DOE).
Suno kay DOE-Oil Industry Management Bureau Director Rino Abad, lauman ang medyo mataas nga price increase sa madason nga semana.
Suno naman sa isa ka oil industry, base sa Mayo 2 tubtob Mayo 5 nga trading, ang presyo sang gasolina kag diesel ang magasaka sa P3.90 tubtob sa P4.20 sa kada litro.
Suno kay Abad, ini ang bangud sang pormal na nga pagduso sang European Commission nga i-ban ang importation sang Russian oil kag nagaplano man ang Estados Unidos nga magbakal sang 60 million nga balor sang crude oil agud nga ma-refill ang strategic petroleum reserve nga nagpataas sang global prices.
Ang mga fuel firms ang masami nga naga-announce sang ila adjustments sa tagsa ka Lunes.
Sang Mayo 3, nagnubo ang presyo sang gasolina sa P0.65 sa kada litro kag ang diesel ang nagnubo sang P1.15 kada litro.
Ang year-to-date adjustment ang may net increase nga P17.80 kada litro sang gasolina kag P30.30 kada litro sang diesel.
