Wala sang lauman nga pagbahar sa presyo sang produktong-petrolyo sa nabilin nga mga inadlaw sa Agusto.
Ini kun basehan ang panan-awan sang Department of Energy (DOE) kun sa diin ginakonsiderar man ang suplay sang nagapanguna nga naga-produce sang produktong-petrolyo nga amo ang Saudi Arabia kag Russia.
Suno kay DOE-Oil Industry Management Bureau Director Rino Abad, ang gina-lauman nga kakulangan sa suplay ang posible nga maglab-ot sa 2.8 million barrels kada adlaw sa Agusto.
Bangud sini, wala sang lauman nga rollback apisar nga anum ka sunod-sunod nga semana na ang pagsaka sa presyo sang gasolina kag pito ka semana naman para sa diesel kag kerosene.
Suno kay Abad, gina-review na subong ang joint memorandum circular agud mapatuman na ang P3-billion fuel subsidy program agud nga mahagan-hagan ang epekto sini nga price hike para sa mga naga-trabaho sa pampubliko nga transportasyon. #
