Ginkumpirmar sang Department of Trade and Industry (DTI) Region 6 nga wala sang pagsaka sa presyo sang mga school supplies sa palaabuton nga pagbukas sang klase sa Hunyo 16, 2025.
Sa interview sang Bombo Radyo kay Rachel Nufable, Regional Director sang DTI Region 6, iya ginpahayag nga ang ini nga pagsulundan ang nagapasiguro nga masarangan sang mga ginikanan ang pagbakal sang mga kinahanglanon sang ila kabataan para sa eskwelahan.
Suno kay Nufable, kadungan sini, nagpagwa naman ang ahensya sang price guide nga “Gabay sa Pamimili ng School Supplies” agud magiyahan ang mga consumers sa pagbakal sang school items.
Ang price guide ang ginalakipan sang sang notebooks, pad paper, lapis, ballpoint pens, crayons, erasers, tahal kag rulers.
Sa subong nga tuig, dugang nga 22 ka stock-keeping units ukon produkto sang nasari sari nga school supplies ang sarang mapilian sa mga supermarkets ukon kabilogan nga 195 ka SKU halin sa 173 ka SKU sang nagligad nga tuig 2024.
Sa 147 ka SKUs halin sang nagligad nga tuig, 101 ukon 52% ang nagpabilin sa kasubong nga presyo.
Samtang 29 ka SKUs ukon 15% ang nagnubo sang presyo subong nga tuig kag 17 ka SKU ukon 9% naman ang nagsaka.
Ginpangabay naman ni Nufable ang publiko nga gamiton ang ginpagwa nila nga Gabay sa Pamimili sa tion magpamalaklon sang mga school supplies.
