Nagsaka gid ang presyo sang mga lokal nga produkto sa La Trinidad, Benguet.
May kaangtanan ini sa epekto sang mga nagligad nga bagyo kag habagat nga nagtuga sang dako nga halit sa kalidad kag kadamuon sang ila mga produkto.
Kabahin sa mga nagtaas gid ang presyo, amo ang strawberry nga anay P150 tubtob P200 lang ang kilo, apang subong naglab-ot na ini sa P800 per kilo.
Suno sa mga manugbaligya, ginabakal nila ang nasambit nga produkto sa malayo nga bahin sang Benguet, bangud nalugi na kag halos naguba gid sang baha ang strawberry farms nga malapit sa ila.
Ginpakigbahin man sang mga ini nga dako ang posibilidad nga mas mapierde pa sila sa ila negosyo kun magapadayun pa ang epekto sang malain nga tyempo.
Nahibaluan nga nagpalab-ot man sang bulig ang Local Government Unit sang La Trinidad sa mga negosyante, agud makabulig sa mga residente sa halit nga ginbilin sang padayun sa gihapon nga paglaslas sang habagat.
