ILOILO CITY- Dako ang kinalain sang presyo sang una gindeliver nga government utility vehicles sang Syudad sang Iloilo kun ipaanggid sa siyam ka units sang salakyan nga pending pa subong sa bahin sang Toyota Iloilo Inc.
Sa interview sang Bombo Radyo kay Elpidio Asuelo Jr. head sang Office of the Seniors Citizens Affairs (OSCA) iya ginpahayag nga nabatun nila ang Toyota Hi-lux 4×2 sang Pebrero.
Suno kay Asuelo santo man sa rekord sang ila log book Pebrero 13 sang subong nga tuig una nila nga nagamit ang nasambit nga salakyan.
Ginpahayag ni Asuelo nga ang salakyan ang ordinaryo lang nga pick-up kag ini ang nagapadasig man sang ila mga transaksyon sa trabaho kag nakabuhin man sa ila gasto sa plete sa pagdul-ong sa mga senior citizens sa ila man pagkuha sang identification cards (I.D).
Ang toyota hilux nga ginhatag sa talatapan sang senior citizens ang nagabalor sang P1,316,250.
Samtang ginpaathag man sang Presidente sang Toyota Iloilo Inc. nga wala sila sang ginpatong nga kun ano sa balor sang toyota hilux nga gin-order sang Iloilo City Government bangud ginsanto lang nila ini sa budget of specs nga ginhatag sa diin nagabalor sang P2.1 million.
Ini bangud nga sa ginpagwa nga kontrata sang city government ang nasambit nga salakyan ang nagabalor sang P2, 178,000 apang santo naman sa pricelist sang toyota nagabalor lang ini sang P1, 073,000.
Sa interview sang Bombo Radyo kay Mr. Robert Uy, iya ginpahayag nga ang siyam ka salakyan nga gin-order sa ila sang city government ang customize models kag nadala na diri ang painting, blinkers, leather sits, tax, warranty, kag ang profit.
Sa siyam ka salakyan suno kay Uy, anom na ang ila natapos nga ginpang customize kag iga-hold niya ang nabilin nga tatlo ka mga salakyan tubtob nga mauntat na ang isyu bangud nakulbaan man siya nga indi sila mabayaran.
kulang naman sila sang stocks sang nasambit nga model sang hilux kag sa Manila pa nila ini ginpaobra agud makalagas man sila sa ginhatag nga budget sang city government.
Ginsabat man niya ang nangin pahayag ni incoming Iloilo City Mayor Jerry Treñas nga kun makapungko na siya bilang alkalde ipakasela niya ang siyam ka mga gin-order nga salakyan.
