ILOILO CITY – Nagpati ang napatay nga drug lord nga si Richard Prevendido nga maluwas ini sang iya mga anting-anting.
Sa interview sang Bombo Radyo Iloilo, ginpahayag ni S/Supt. Marlon Tayaba, director sang Iloilo Provincial Police Office (IPPO), ang ground commander sang ginpatigayon nga operasyon sa puluy-an ni Prevendido sa Barangay Balabago, Jaro, Iloilo City nga lakip sa mga nakumpiska nila sa ginapanaguan sang drug lord ang madamo nga anting-anting.
Sa pagkamatuod suno kay Tayaba, sang makorner sang SWAT si Prevendido, hublas ini kag ang ginasuksok lang amu ang iya anting-anting.
Sa pagsulod sang Bombo Radyo news team sa crime scene, nagkalain-lain nga klase sang lana ang nasapwan sa puluy-an ni Prevendido kag may mga botelya nga may marka nga “Friday the 13th”.
Madamo man sang rebulto ang nasapwan sa puluy-an ni Prevendido, mga laya nga sanga kag gamot sang kahoy, kandila, bato, kag duha ka sutana nga itom nga ginapatihan ginagamit ni Prevendido sa iya mga ritwal.
Samtang ginalauman naman sang utod ni Prevendido nga si Punong Barangay Remia Gregori sang Bakhaw, Mandurriao, Iloilo City ang kamatayon sang iya utod.
Nabaton na sang punong barangay ang nadangatan sang drug lord bangud tanan ang may katapusan.