Naglab-ot sa 1 million ang ginpromisa nga trabaho sang pribado nga sektor subong nga tuig.
Apang mahimo lamang ini kun mabuligan sang gobyerno ang ila nga “wish list” kaangay sang bakuna kag maayo nga transportasyon sa mga mamumugon.
Suno kay Sergio Ortiz-Luis, Presidente sang Employers Confederation of the Philippines (ECOP), ang mga pribado nga sektor mismo ang boluntaryo nga nagpahayag nga masarangan nila nga maghimo sang isa ka milyon nga mga trabaho para sa mga Pilipino.
Sa idalom sang “Reform. Rebound. Recover: One million jobs for 2021”, solusyonan sang nagkalain-lain nga ahensya sang gobyerno ang problema sa transportasyon sang mga mamumugon, buligan ang pribado nga sektor sa pagpangita sang kwalipikado nga aplikante kag hatagan sang access sa bakuna kontra COVID-19 ang mga empleyado nga mangin kabahin sang proyekto.
Nahibaluan nga base sa labor force survey sang Mayo, naglab-ot sa masobra 3.7 million ka mga Pilipino ang wala sang trabaho gani subong, target sang gobyerno nga mahatagan sang obra ang 2.4 million tubtob 2.8 million ka mga indibidwal subong nga tuig.
