ILOILO – Nagtimbuok ang presyo sang karne sang baboy sa Iloilo.
Sa interview sang Bombo Radyo kay Nena Jor, isa ka manugbaligya sa Mandurriao Public Market, iya ginpahayag nga indi na magnubo sa P200 ang presyuhanay subong sang karne sang baboy.
Suno sa natungdan, ila ginakuha ang ila baligya nga baboy sa probinsya sang Iloilo bangud barato ang presyo sini.
Ginpahayag ni Jor nga bangud sa price ceiling, napilitan ang probinsya sang Iloilo magpanubo sang presyo sang baboy sa diin diri nagakumpra ang mga manugbaligya sa Manila.
Matandaan nga ginmando ni Presidente Rodrigo Duterte sa iya ginpaggwa nga Executive Order (EO 124) ang pagtalana sang price ceiling nga magapugong sa pagtaas sang presyo sang produkto nga baboy kag manok.
Ang nasambit nga price ceiling ang epektibo sa Metro Manila sa sulod sang duha ka bulan.
Mayor sini nga katuyuan amo nga masolusyunan ang pagtaas sang presyo sang mga balaklon nga nagapabug-at sa mga pumuluyo ilabi na sa mga pigado.
