UNITED KINGDOM – Ginmandu na ni Prince Charles, Prince of Wales, nga buksan ang ExCeL London bilang hospital agud nga magamit sang mga pasyente nga nadapu-an sang Coronavirus Disease 2019 (COVID-19) sa United Kingdom nga ginpaidalom na sa lockdown.
Suno kay Bombo International Correspondent Roland Crispo direkta sa Oxford, England, ang ExCel London nga isa ka exhibition kag international convention centre sa Custom House area sang Newham, East London, ang ginhimu nga hospital nga may maximum capacity nga 4,000 patients kag pagadumalahan sang 2,000 ka medical experts.
Suno kay Crispo, pagabuksan man sa katapusan sang Abril ang duha ka Nightingale hospital sa Bristol kag Harrogate agud nga magbaton sang COVID-19 patients.
Ginpahayag ni Crispo nga ginaduso sa subong ang massive COVID-19 testing kag Swab testing agud nga mahibalu-an ang kabug-usan nga numero sang pasyente nga nalatnan sang virus.
Kasubong sa Pilipinas, ginpahayag sang natungdan nga daku nga pagpanghangkat sa United Kingdom ang kakulang sang Personal Protective Equipment, facemask kag alocohol apang sa pihak sini, wala naga-untat ang gobyerno sa pagpangita sang paagi agud nga makabakal sang dugang nga supply.
Ginalauman nga malab-ot ang red warning bangud sa nagataas nga numero sang COVID-19 patients kun sa diin sa pinaka-ulihi nga data, 33,718 na ang kumpirmado nga kaso, 191 ang naka recover kag 2,921 ang patay.
Lakip sa mga kilala nga personalidad sa United Kingdom nga gindapu-an sang COVID-19 amo sanday Prince Charles kag UK Prime Minister Boris Johnson.
Sa subong nga may pandemic, ginpahayag ni Cripo nga alalangay lang ang padulungan sang First tubtub sa Third world countries apang ang kinalain lang amo nga ang mga manggaranon nga pungsod ang makasarang sa pagbakal sang madamo nga Personal Protective Equipment kag COVID-19 test kits.
