Nag-issue sang emotional tributes sanday Prince William kag Harry sa ila nga lolo nga si Prince Philip nga nagtaliwan sa edad nga 99 anyos.
Liwat nga nag-updanay ang duha ka mga apo ni Philip matapos ang ginakaulamiran nga kontrobersiya sang British Royal Family tuhoy sa ginaalegar racism.
Ang pagpadulong ni Harry sa Britanya ang labing una nga kahigayunan humalin sang siya kag tiayon nga si Meghan ang nagbiya sa ila tagsa ka mga royal duties kag nag-istar sa North America.
Gintawag ni Harry ang iya lolo nga “a man of service, honor and great humor”.
Nagpasalamat man ini kay Prince Philip bangud sa serbisyo kag dedikasyon sini.
Sa subong, magapabilin anay si Prince Harry sa Frogmore Cottage sa Windsor, England bilang kabahin sang coronavirus protocols antes magtambong sa haya sang ila lolo.
Samtang suno naman sa anak ni Prince Philip nga si Prince Andrew, apisar nga kilala ang iya iloy nga si Queen Elizabeth II nga mabakod kag wala gid nagareklamo, makit-an nila nga tuman ini nga naapektuhan sa pagtaliwan sang iya bana nga ginkilala bilang “grandfather of the nation”.
