Nagakasubo ang bug-os nga Britanya ilabi na ang British Royal Family kasunod sang pagtaliwan sang 99 anyos nga si Prince Philip, Duke of Edinburgh kag bana ni Queen Elizabeth II.
Kasunod sini, magabalik man sanday Prince Harry kag asawa nga si Meghan Markle sa Britanya agud magtambong sa lubong ni Prince Philip.
Suno kay Bombo International Correspondent Ramil Isogon direkta sa United Kingdom, napaidalom sa gihapon sa national lockdown bangud sa COVID-19 pandemic ang pungsod Britanya kag wala sang state funeral nga hiwaton para kay Prince Philip.
Padayon sa pagbilin ang mga tawo sang mga bulak, pagkuha sang mga picture kag pagbilin sang sulat sa sagwa sang Buckingham palace.
Pahayag ni Isogon, sa mga lamharon, nangin kilala man si Prince Philip bilang may panindugan nga tigulang ilabi na sa mga isyu sa sosyudad.
Igalubong si Prince Philip sa Windsor Castle malapit sa iya funeral sa St. George’s Chapel.
Nahibaluan nga si Prince Philip ang na-ospital sang Pebrero bangud sang heart problem kag nakagwa sang nagligad nga bulan.
Ginkumpirma man sang Buckingham Palace nga ang hospitalization ni Prince Philip ang wala sang kaangtanan sa COVID-19.
