ILOILO CITY – Wala sang ayo ang pagbayad sang Panay Electric Company sang ginabanta P134 million nga tax liability sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga santo sa kasugtanan, ang principal amount lamang ang pagabayaran anay sang Panay Electric Company.
Suno kay Treñas, luyag sang Panay Electric Company nga hulaton nga matapos sang assessment board ang pagsuma sang interes sa sulod sang pila ka tuig nga wala nabayaran ang buwis.
Ginpahayag ni Treñas nga kun indi matuman sang Panay Electric Company ang nasambit nga pagsulundan, igalakip sa auction nga patigayunon sa Disyembre 12 ang pila ka asset sang kompaniya.
Samtang, ginakalipay naman ni Treñas ang asud-asud nga pasidungog nga nabaton sang Iloilo City Government kasubong sang Best in Disaster Risk Reduction and Management Council kag ang Clean City Award sa Association of South East Asian Nations.
Suno sa alkalde, iya gid nga ginapasalamatan ang tanan nga nangin kabahin agud nga makuha sang syudad sang Iloilo ang nasambit nga mga pasidungog.
Bilang alkalde suno sa natungdan, indi siya mag-untat sa pagpangita sang paagi agud nga matuman ang ginahandum nga pag ‘level-up’ sang syudad sang Iloilo.
