Nagpaathag ang principal sang Dueñas Central Elementary School kaangot sa kontrobersiya nga wala sini gin-imbitar ang si Duenas, Iloilo Mayor Robert Martin Pama sa ila ginhiwat nga alumni homecoming.
Sa interview sang Bombo Radyo kay Mr. Joseph Pretal, principal sang Dueñas Central Elementary School, iya ginklaro nga gin-imbitar niya ang alkalde sang ila banwa lakip na ang mga municipal officials.
Suno kay Pretal, personal niya nga gindul-ong ang invitation letter sa Office of the Mayor sang amo nga banwa kag ginbaton sang staff sang opisina.
Gin-athag man sini nga bilang principal, kinahanglan nga may yara gid imbitasyon ang alkalde ilabi ini ang nagaserbe nga amay sang banwa.
Wala naman nakakadto ang alkalde sa amo nga kahiwatan lakip na ang mga pila ka mga municipal officials apisar nga sila ang imbitado.
Ginbuyagyag man ni Pretal nga yara ang pangalan ni Pama sa ila program nga nakatalan kontani nga maghatag sang mensahe sa amo nga kahiwatan.
Ginklaro man sang principal nga wala siya sang nabaton nga sulat nga nagamando sa iya nga paghalin sa amo nga buluthuan rason nga padayon siya nagaserbe bilang principal.
Handa naman si Pretal nga magpanaog sa pwesto kon may mando nga nagahalin sa Department of Education (DEPED) Schools Division Iloilo.
Nahibaluan nga una naman nga gin-athag ni Mayor Pama nga may yara siya sang nabaton nga invitation halin sa Duenas Central Elementary School para sa Alumni Homecoming sang nagligad nga Disyembre 21.
Ini ang baliskad man sa impormasyon nga naguwa nga wala gin-imbitar ang alkalde sang school principal rason nga ginpahalin ini sa pwesto.
Apang, sang Disyembre 23, 2024, ginpatawag si Pretal kag ang mga school principal sang Public School District Supervisor agud nga ipahibalo nga may reshuffling nga matabo sa ila.
Ginpahayag man sang principal nga wala sang conflict nga nagakatabo sa iya kag sa Alumni Association sang Dueñas Central Elementary School.
