Nag-withdraw ang Coordinating Council of Private Educational Associations (COCOPEA) sa National Task Force to End Local Communist Armed Conflict (NTF-ELCAC) agud nga mapabilin ang academic freedom.
Napasalig man ang COCOPEA sa pagpadayon sang ila collaborative nga papel sa guwa sang NTF-ELCAC kasunod sang konsultasyon sa tunga sang ila mga katapo sa asosasyon kag sa pagrepaso sang ila mga core advocacies.
Suno sa COCOPEA, ang konseho nagapabilin nga malig-on sa iya papel bilang isa ka “independent” nga non-government organization nga nagarepresentar sang interes sang pribado nga sektor sang edukasyon samtang nagatinguha ini sa pagpasanyog kag pag-amlig sang kalidad nga edukasyon sa pungsod.
Ang inclusion sang COCOPEA sa NTF-ELCAC gin-anunsyo sang executive director sang task force nga si Undersecretary Ernesto Torres Jr. sang Nobyembre 2024.
Una na nga ginpahayag ni Torres nga ginarespeto sang NTF-ELCAC ang desisyon sang COCOPEA nga mag-withdraw sa ila Executive Committee bangud ang tikang nga isa ka “internal matter.”
Ginhatagan man pagtamod ni Torres nga magapadayon sa gihapon ang kolaborasyon sang COCOPEA sa nasambit nga task force.
Sa pihak sang pag-atras sang COCOPEA, si Torres nagsiling nga ang NTF-ELCAC nagapabilin nga malig-on sa ila kampanya batok sa violent extremism kag terrorist-grooming, partikular ang pagrekrut sang mga lamharon nga estudyante.
