ILOILO CITY – Nagalaum ang Private Hospitals Association of the Philippines Inc. (PHAPI) sa incoming administration nga kay-uhun ang reimbursement system sa state insurer nga PhilHealth.
Suno kay Dr. Jose De Grano, presidente sang PHAPI, ang mga pribado nga ospital ang nagasalig sa reimbursement mechanism sang PhilHealth apang ang pila ka claims sang ospital ang na-delay kag may yara man nga wala pa na-release.
Sang nagligad nga Disyembre, ang pila ka ospital ang nagpabutyag nga utdon na ang kaangtanan sa state insurer bangud sang minilyon ka pesos nga unpaid claims nga nagtingob na halin pa sang nagligad nga mga tuig.
Suno kay PhilHealth CEO and president Dante Gierran sang Enero, ang PhilHealth ang may utang sa mga ospital sang masobra P25 billion kag plano nga bayaran ini sa Hunyo.
Ang mahinay nga pagbayad sang claims ang bangud sang kakulang sang manpower kag information technology bangud sang pandemya.
Apang suno kay De Grano, nakapakig-angut na ang PhilHealth kag nagabayad na sang utang.
As of January 7, nakapagwa na ang ahensya sang P12.05 billion sa 444 ka mga ospital pinaagi sa Debit-Credit Payment Method (DCPM).
Ang PhilHealth ang nakapangatubang sang pila ka corruption issues bangud sang alegasyon nga may mga opisyal nga nagbulsa sang P15 billion in public funds kag nag-aprubar sang overpriced projects kag nag-release sang pondo pabor sa ospital.
