ILOILO CITY- Sa interview sang Bombo Radyo kay Dr. Teodoro Robles, Presidente sang Central Philippine University, iya ginpahayag nga nagakahangawa sila bangud madamo sa ila mga maestro kag maestra ang madulaan sang trabaho kag palangabuhian.
Suno kay Robles, halos 600 ang ila regular nga empleyado kag kinahanglanon man sang mga ini nga masustiner ang ila pamilya.
Pahayag pa niya, kun wala sang klase, “no work, no pay” ang mga manunudlo, kag dako ang epekto sini sa ila palangabuhian.
Samtang ginpahayag man ni Teodoro nga ginatan-aw nila ang mga alternatibo agud mapadayun ang pagtuon sang mga kabataan.
Suno kay Robles, plano nila magpatigayun sang online clases agud padayon ang pagtuon sang mga estudyante apisar yara ang mga ini sa ila tagsa ka panimalay.
Suno sa iya, importante nga indi mauyangan ang tyempo sang mga kabataan bangud kanugon sang tinion nga ma-usik nga kuntani madamo na sang natun-an ang tagsa ka estudyante.
May yara man suno sa iya sang pasilidad nga ipagamit sa mga manunudlo agud makatudlo online.
Sa tion nga makabalik na sa face-to-face ang pagtudlo, may yara naman sila suno kay Robles sang blended instructions nga pagagamitun agud mapatuman ang physical distancing sa mga bumulutho.
Indi man siya pabor suno sa natungdan sa ginpahayag ni Presidente Rodrigo Duterte nga indi pagdayunon ang klase bangud kun hulaton pa ang vaccine, posible matuigan pa antes makabalik sa pagtuon ang mga kabataan.
