Suportado sang pila ka mga opisyal sang Iloilo ang payoridad sang Department of Transportation (DOTr) nga privatization sang Iloilo International Airport.
Subong nga adlaw nagbisita si DOTr Sec. Vivencio Dizon sa Iloilo agud malantaw ang sitwasyon sang nasambit nga paluparan.
Sa interview sang Bombo Radyo kay Governor Defensor, iya ginpahayag nga mas madasig maghulag ang pribado nga kompanya ilabi na sa pagpatukod sang mga proyekto.
Suno kay Defensor, ang manami sa privatization amo nga indi maggasto sang dako ang gobyerno ilabi na kon manami ang operator.
Ginpahayag man sini nga kon may mga problema, mas madasig nga magkay-o ang private entity kon ikumpara sa gobyerno
Ginkalipay naman ni USWAG Ilonggo Partylist Representative Jojo Ang sa paghatag igtalupangod ni Secretary Vivencio Dizon sa privatization sa Iloilo International Airport.
Suno kay Ang, madugay na nga handom sang mga lideres sang Iloilo ang amo nga tikang agud ma-modernize ang paluparan.
Para sa natungdan, isa ini ka kahigayonan nga mapalapad ang airport kag maka-akomodar sang mas madamo nga turista.
