ILOILO CITY–Gin-athag sang Police Regional Office (PRO) 6 nga indi pa hilway sa kaso ang mag-asawa nga sanday Sara Mayor Ermelita Salcedo kag anay Mayor Neptali Salcedo.
Ini matapos ang pagserbe sang search warrant sa balay sang pamilya Salcedo sa Sara, Iloilo.
Sa interview sang Bombo Radyo kay Police Chief Superintendent John Bulalacao, director sang PRO-6, iya ginpahayag nga may nabaton siya nga impormasyon nga nagapanago sa isa ka isla sa nasambit nga banwa si anay Mayor Neptali Salcedo.
Hulaton na lang suno kay Bulalacao nga may ipaguwa nga warrant of arrest batok sa anay alkalde.
Gipromisa man ni Bulalacao nga pangitaon kag dakpon gid ang anay alkalde.
May kaangtanan diri, gin-athag man sang PRO-6 director nga indi man hilway sa kaso si incumbent Mayor Ermelita Salcedo kag ang menor de edad nga live-in partner ni dismissed SPO4 Nerio “Ricky” Salcedo.
Ang  16 anyos nga si alyas “Babe” ang ginatugyan sang PRO-6 sa kuntosiya sang Department of Social Welfare and Development (DSWD).
Sanday Mayor Salcedo kag ang menor de edad ang yara sa balay sang ginserbe ang search warrant kag nakuha ang mga de kalibre nga armas-luthang samtang si anay Mayor Salcedo naman ang isa sa mga subject sang search warrant.