Gintawgan gilayon sang Police Regional Office 6 ang mga police provincial directors kag city directors agud nga ipatuman ang ginmandu ni Presidente Rodrigo Duterte nga ipasirado ang mga gaming entities sa idalom sang Philippine Charity Sweepstakes Office.
Sa interview sang Bombo Radyo kay Brigadier General Rene Pamuspusan, Regional Director sang Police Regional Office 6, iya ginpahayag nga kinahanglan tsekyaron sang maayo sang mga kapulisan ang mga Lotto outlet sa tagsa ka mga lugar agud nga mahibaluan kun bala nasirado na ini ukon wala pa.
Suno kay Pamuspusan, kadungan sang mandu ni Presidente Duterte, naghingyo man ini sa mga kapulisan nga magpasa sang report of compliance sa mga Lotto outlet nga natigayon na nga masiraduhan.
Dugang pa sang natungdan, sa tion nga may madakpan ang mga kapulisan nga nagadapayon sa pag-operate sa mga gaming entities sang PCSO, indi na magduha-duha ang otoridad nga mangdakop kag mapasakaan sang kaso.
