ILOILO CITY–Indi mabaton ni Police Regional Office (PRO) 6 PCSupt. John Bulalacao ang pagpangayo sang pasaylo ni 1st District Cong. Richard Garin.
Ini ang may kaangtanan sa ginapahayag pagpangsapote kag pagdupla ni Garin kay PO3 Federico Macaya Jr., imbestigador sang Guimbal Municipal Police Station.
Sa interview sang Bombo Radyo kay Bulalacao, iya ginpahayag nga tuman ang iya kaugot sa ginbuhat nga pagdaug-daug ni Garin kay Macaya.
Sa pagkamatuod suno kay Bulalacao, nakalab-ot na ang tuhoy diri kay Philippine National Police (PNP) Chief Director General Oscar Albayalde kag kay Pres. Rodrigo Duterte.
Ginpahayag ni Bulalacao nga sampaw-sampaw nga kaso ang ila nga ipasaka batok kay Cong. Garin kasubong sang physical injuries, grave threat, alam and scandal kag direct assault of person in authority.
Magluwas kay Cong. Garin, maumid man sa kaso ang amay nga si Guimbal Mayor Oscar Garin nga yara man sa police station sang natabo ang insidente kag ginapahayag nagtaya man sang iya pusil kay Macaya.
Wala man sang problema suno kay Bulalacao sa ginahingyo ni Garin nga dapat pasakaan sang kaso ang naangot sa inaway nga natabo sa tunga sang SK Kagawad kag isa ka lalaki apang kuntani wala lang niya ginbastos ang Guimbal PNP.
Nagpaandam naman ang Regional Director nga indi paghatagan sang police escort ang pamilya Garin.
Bangud sa natabo iya nga ginmandu ang pagrelieve sa tanan nga police officer sa Guimbal Municipal Police Station samtang si Police Chief Inspector Reymond Celoso ang nagserbe nga bag-o nga hepe.