Ginpahanumdom sang director sang Police Regional Office (PRO) VI nga dapat nga padalman gid sang mga kapulisan ang mga insidente ilabi na ang naga-involve sang discharge of firearms.
Kaangot ini sa kaso sang kamatayon ni Duenas, Iloilo Vice Mayor Aimee Paz Lamasan nga naangot sa accidental firing samtang yara sa iya balay sa La Paz, Iloilo City.
Mismo ang Department of the Interior and Local Government (DILG) Secretary ang napigawan sa imbestigasyon sang pulis. Bangud sa lapses, ginsapubliko subong nga adlaw nga gin-relieve sa pwesto si Iloilo City Police Office (ICPO) Director Police Colonel Kim Legada kag Iloilo City Police Station (ICPS) 2 Commander Police Captain Jeffrey Delgado.
Suno kay PRO VI Director Bgen Josefino Ligan, sa kaangay sini nga kaso, dapat nga kadtuan gilayon kag dapat nga may team sang scene of the crime operatives (SOCO). Mausisa lang sang maayo ang kaangay nga hitabo suno sa iya kun may forensic investigation.
Ginpahanumdom man sini sa mga personnel nga kun magresponde sa anuman nga kaso, indi lang dapat magsalig sa isugid sang mga tawo sa palibot, kundi tul-iron gid ang mga sirkumstansya sa kaso.
“Hindi tayo mag-re-relay sa sasabihin ng tao na, ‘Sir, suicide yan.’ No. We conduct investigation, proper investigation,” suno sa PRO VI director. “Kasi mamaya, sasabihin [nila] na nag-suicide, pero binaril pala,” suno kay Ligan sa iya nga ginhatag nga halimbawa.
Sa iya mensahe sa publiko, nagpasalig si Ligan nga indi pag-itolerar kag indi na maliwat ang lapses sa imbestigasyon sang kapulisan. Maga-conduct man ang pamunuan sang refresher course agud nga mas mangin maayo ang ihibalo sang mga pulis sa rehiyon sa investigative procedure.
