Gin-athag sang Police Regional Office 6 nga indi organisado nga grupo ang sa likod sang natabo nga serye sang mga holdup incidents sa Iloilo subong nga Pebrero.
Sa interview sang Bombo Radyo kay Police Lieutenant Colonel Arnel Solis, spokersperson sang Police Regional Office 6, iya ginpahayag nga lunsay mga indibidwal gid lang nga mga kriminal ang responsible sa nasambit nga mga pagpanghold-up.
Suno kay Solis, base sa record sang mga suspek, wala man na-involve ang mga ini sa mga previous holdup incidents.
Nahibaluan nga subong nga bulan, apat na ang narecord nga holdup.
Una, ang natabo sa Pavia sang Pebrero 10, kung sa diin ginhold-up ang isa ka fuel tanker sang Metro Iloilo Transport Service Cooperative (MITSCOOP) samtang sakay naman sa Mitsubishi Mirage ang suspek nga may kaupod nga lookout nga nagasakay sa motorsiklo sa Brgy. Pandac, Pavia.
Nataban sang mga suspek ang masobra P300,000 nga benta sang kooperatiba.
Ikaduwa, ang natabo sa banwa sang Sta. Barbara sang Pebrero 11 kun sa diin manogbaligya sang herbal product ang nabiktima nga si Jimmy Arriesgado, 50-anyos kag residente sang Barangay San Isidro, Jaro, Iloilo City samtang ang suspek ang wala pa makilal-an nga nakataban sang ginabanta P20,000 nga cash, bulong kag cellphone sang biktima sa Brgy. Guno, Sta. Barbara.
Ikatatlo, ang natabo sang Pebrero 18 sang udto sa Brgy. San Juan, Barotac Viejo kun sa diin nabiktima diri ang Indian national nga si Khuswant Sig Grewal, 22-anyos kag nagatinir sa distrito sang Jaro.
Nataban sang mga suspek ang P4,500 nga kwarta sang biktima apang natigayon nga madakpan ang isa sa duwa ka suspek nga si Jan Pril Sinoy sang Brgy. Bancal, Lemery kag napasakaan na sang kaso samtang nakapalagyo naman ang iya upod nga padayon nga ginaayam sang mga kapulisan.
Ikaapat, pagkatapos sang insidente sa Barotac Viejo,pagakagab- i, natabo man ang pagpanghold-up sa isa ka manogbaligya sang isda nga si Angelyn Pabilona, 42-anyos kag residente sang Barangay Cabugao Viejo sa Brgy. Camiri, San Enrique, Iloilo kun sa diin nataban diri ang P159,000 nga cash kag cellphone.
Nagpanugyan si Solis sa publiko nga mag-aligmat gid sa ila palibot.
Mas maayo man nga may yara sang ginauyatan ang pumuluyo nga contact number sang pinakamalapit nga police station.
Nagpasalig man ini nga padayon ang pagpasangkad sang police visibility agud matahap ang mga kriminal.
