Wala sang ginlapas nga order ang Guimaras Police Provincial Office (GPPO) sa ila pag-relive kag pag-transfer sang Chief of Police sang Buenavista Municipal Police Station.
Nahibaluan nga ginkwestyon ni Buenavista Guimaras Mayor Eugene Reyes ang pagbaylo sang hepe sa ila banwa.
Ginakibot sang alkalde nga ang ginbutang nga bag-o nga hepe sa Buenavista PNP amo ang wala nalakip sa short list nga ginpadala sa iya sang direktor sang GPPO nga si Pol. Col. Richard Baluis .
Sa interview sang Bombo Radyo kay Pol. Lt. Col. Arnel Solis, spokesperson sang Police Regional Office (PRO) 6, iya ginpahayag nga nauna na nga ginpatigayon ang reshuffling sang personnel sa Guimaras bag-o nag take effect ang order ni Philippine National Police (PNP) Chief General Dionardo Carlos sang Abril 1.
Sa amo nga order nakasaad nga i-refrain ang movement sang mga PNP personnel kag officials sa bilog nga pungsod kun wala sang proper clearance halin sa Chief PNP ukon sa Directorate for Personnel and Records Management sa National headquarters.
Ang reshuffling sa Guimaras suno kay Solis ang ginpatigayon bag-o pa ang pagpapanaug sang order sang PNP Chief.
Dugang pa ni Solis, gin-aprubahan man sang Commission of Election (COMELEC) Region 6 ang pagbaylo sang hepe sa Buenavista Municipal Police Station.
Ginpasigurado naman ni Atty. Wilfred Jay Balisado, direktor sang COMELEC Region 6 nga may yara sang ginapadala nga recommendation letter si PRO 6 Regional Director PBGen Flynn Dongbo sa tion nga may yara sang movement sa mga PNP personnel sa Western Visayas.
Sa interview sang Bombo Radyo kay Balisado, iya ginpahayag nga may yara sang COMELEC approval ang natabo nga reshuffling sang Chief of Police sa probinsya sang Guimaras.
