SARA, ILOILO – Gina-imbestigaran na sang Police Regional Office 6 ang ginapahayag indiscriminate firing sa Sara, Iloilo kun sa diin naulamid ang isa ka PNP personnel.
Santo sa statement sang Police Regional Office 6, ang nasambit nga PNP personnel amo si Police Major Terrence Paul Sta. Ana nga amo ang Assistant Chief sang Regional Learning, Doctrine and Development Division kag ang insidente ang natabo sa Regional Service Training Unit Compound, 2nd Iloilo Provincial Mobile Force Company Headquarters sa Sara, Iloilo.
Ginapahayag nga yara sa impluwensya sang makahulubog nga ilimnon si Sta. Ana sang nagpalupok sang armas, pasado 3:00 sang hapon sang Oktubre 8.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga gilayon nga ginmandu-an ni Police Brigadier General Rene Pamuspusan si Police Colonel Ross Alvarado nga amo ang Deputy Regional Director for Operations lakip na ang pinuno sang Regional Investigation and Detective Management Division nga magpatigayon sang imbestigasyon.
Suno kay Malong, si Sta. Ana ang ginpaidalom sa camp restriction samtang ang iya armas ang gin turn-over sa Regional Logistics and Research Development Division kag natalana nga ipaidalom sa ballistics examination.
Ginkumpirma naman ni Police Colonel Gilbert Gorero, Officer-in-Charge sang Iloilo Police Provincial Office, nga si Police Major Jose Nemias Pamplona, hepe sang Sara Municipal Police Station, ang nagapatigayon na sang imbestigasyon kag ginmandu-an ang mga personnel sang Regional Special Training Unit 6 nga assigned sa RSTU Compound nga magpasa sang incident report.
Pagkatapos sang initial investigation, ang kaso ang igapasa sa Regional Internal Affairs Service 6 santo sa NAPOLCOM Memorandum Circular 2016-002 kag ang Internal Affairs Service ang magapatigayon sang motu proprio investigation.
