ILOILO – Ginahulat na lang sang Police Regional Office 6 ang mandu gikan sa Philippine National Police headquarters tuhoy sa pagpangdakop sa mga preso nga nahatagan sang Good Conduct Time Allowance apang wala nagsungka sa ginhatag nga plaso ni Presidente Rodrigo Duterte.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga nabaton na nila ang memorandum halin sa Directorate for Operations nga ginadula na ang ban sa pagpatigayon sang manhunt operations.
Suno kay Malong, nakasaad sa memorandum ang tuhoy sa partial list sang 19 ka mga preso apang wala diri nasaad nga may yara sang taga Western Visayas.
Ginpahayag ni Malong nga magapakig-angot ang Police Regional Office 6 sa iban nga Regional Office agud nga mahibalu-an kun sa diin na subong ang mga preso nga nalakip sa listahan.
Ang Criminal Investigation and Detection Group naman ang magaserbe nga lead agency kag may tracker team man nga magabulig sa manhunt operations.
Wala naman nakasaad sa memorandum suno kay Malong ang tuhoy sa P1 million reward para sa makatudlo sa ex-convicts nga wala nagsungka.
Sa subong suno kay Malong, padayon naman ang validation sa records sang mga preso nga nagsungka nga yara subong sa kustodiya sang Sablayan Prisonand Penal Farm sa Occidental, Mindoro.
