Ginakabig sang Police Regional Office 6 (PRO-6) nga makaalarma ang pagduging sang iligal nga druga sa Western Visayas.
Sa interview sang Bombo Radyo kay Police Brigadier General Jack Wanky, regional director sang PRO-6, iya ginpahayag nga isa ka dako nga pagpanghangkat sa bahin sang kapulisan ang liwat na naman nga pagdamo sang iligal nga druga.
Suno kay Wanky, kinahanglan nga magbuligay gid ang mga law enforcement agencies agud nga mapasangkad ang pagbantay sang iligal nga druga nga posible makasulod sa rehiyon.
Ginlaragway man sini nga ang mga nagakalakdan nga dalagko nga balor sang iligal nga druga ang isa ka ‘affirmation’ sang tikang nga ginahimo sang Philippine Drug Enforcement Agency (PDEA).
Ginpunto man sang regional director ang role sang Barangay Anti-Drug Abuse Council (BADAC) sa pagtapna sang iligal nga druga.
Dugang sini nga ang BADAC ang may responsibilidad sa pag-monitor sa tagsa ka mga barangay ilabi na sa mga indibidwal nga anay may engagement sa illegal drugs.
Gin-athag man ni Wanky nga indi lamang concern sang tagsa ka barangay, PRO-6, kag mga otoridad, kundi concern man sang tagsa ka Local Government Unit (LGU).
