ILOILO CITY–Ginapabawi sang Police Regional Office (PRO) 6 ang tanan nga police escort sang pamilya Garin.
Ini ang nangin desisyon ni PRO-6 Director Police Chief Superintendent John Bulalacao kasunod sang natabo nga pagkastigo ni 1st District Cong. Garin kay PO3 Federico Macaya Jr.
Sa exclusive interview sang Bombo Radyo kay Bulalacao, iya ginpahayag nga matapos ang natabo, ginabawi na sang PRO6 ang tanan nga police escort kag police security sa tanan nga katapo sang pamilya Garin.
Magluwas diri, ginhatagan man ni Bulalacao sang ultimatum ang pamilya Garin nga isungka ang ginapanag-iyahan nga unlicensed firearms.
Insulto suno kay Bulalacao indi lamang para kay Macaya kundi lakip na sa bug-os nga hanay sang Philippine National Police (PNP) ang ginhimu ni Cong. Garin.
Bangud sini, ang Deputy Regional Director for Operations ang magapamuno sa imbestigasyon sa natabo.
Sa pagkamatuod suno sa iya, ang bug-os nga hanay sang Guimbal Municipal Police Station ang naghingyo nga irelieve sila kag isaylo sa iban nga unit sang PNP.
Ini bangud nga suno sa Guimbal PNP, indi na sila maluyag nga magserbe sa  Guimbal, Iloilo matapos ang natabo.