ILOILO CITY – Nagalaum si Police Regional Office 6 Director Police Brigadier General oRene Pamuspusan nga mangin madasig ang pag-ayo sang tanan nga sakay sang Bell 429 twin-engine rotary wing aircraft nga nagtibusok sa Laguna kun sa diin sakay si Philippine National Police Chief Police Gen. Archie Gamboa.
Sa interview sang Bombo Radyo kay Pamuspusan, iya ginpahayag nga wala na siya sang may ginapangamuyo kundi ang ‘fast recovery’ sang tanan nga sakay sang chopper.
Suno kay Pamuspusan, ginakalipay niya nga wala sang may ginbaiw-an sang kabuhi sa nasambit nga aksidente kag iya nga ginapangamuyo nga mangin estable na ang kondisyon sanday Director for Intelligence Police Major General Mariel Magaway kag Directorate for Comptrollership Police Major General Jovic Ramos nga nagapabilin sa kritikal nga kondisyon.
Ginpahayag ni Pamuspusan nga sa subong, wala siya sang direkta nga komunikasyon sa mga naulamid sa chopper crash bangud nga luyag niya nga hatagan sang ligwa ang pagpahuway sang mga biktima sa hospital.
Nahibalu-an nga magluwas kanday Gamboa, Ramos kag Magaway, nalakip man sa sakay sang chopper amo sanday PNP Spokesperson Police Brigadier Gen. Bernard Banac, aide de camp ni Gamboa, technician kag 2 ka piloto.
