Ginapasigurado sang Police Regional Office (PRO) 6 nga mahimo nga makapangayo sang security protection sa kapulisan ang mga katapo sang media nga nagaka-eksperyensya sang mga pagpamahog.
Ini matapos ang natabo nga pagpangluthang sang mga suspek nga riding in tandem sa isa ka anchorman sa Brgy. Cagay, Roxas City las-5:40 kahapon sang aga.
Suno kay PRO 6 Acting Regional Director PBGen Randulf Tuaño, mahimo makapangayo sang security protection ang mga media personnel paagi sa Police Security and Protection Group (PSPG) kun sa diin may yara sang otoridad ang director sang PSPG nga maghatag sang temporaryo nga 30-day security protection samtang gina-verify ang aplikasyon sang isa ka media practitioner.
Posible man nga mahatagan pa ini sang mas malawig nga proteksyon kun mapamatud-an ang pagpamahog.
Pahayag pa sini nga dapat pro-active ang katapo sang media nga sa tion nga may mabaton nga pamahog sa ila kabuhi, dapat ini gilayon nga ipahibalo sa Public Information Officers (PIO) sang kapulisan agud mahatagan gilayon sang nagakaigo nga proteksyon.
Samtang sa pihak nga bahin, gilayon man nga nagtukod sang Special Investigation Task Group (SITG) ang PRO 6 agud magpatigayun sang mas masangkad nga imbestigasyon naangot sa nasambit nga pagpangluthang sa isa ka broadcaster.
Ginpahayag ni PBGen Tuaño, ang SITG ang ginapangunahan sang R7 ukon Regional Investigation and Detective Management Division (RIDMD), kaupod ang Criminal Investigation and Detection Group (CIDG), Regional Intelligence Unit (RIU), kag ang Provincial Investigation Team sang Capiz Police Provincial Office.
Madumduman nga sandig sa imbestigasyion sang kapulisan, apat ka beses nga ginluthang ang media personality sakay sa iya salakyan kahapon sang aga apang maswerte nga wala ini naigo kag wala man nakaagum sang pilas.
Dugang pa ni PBGen Tuaño, iya ginapanawagan sa mga myembro sang media nga kun may mabaton nga pagpamahog sa ila kabuhi, gilayon ini nga ipahibalo sa pinakamalapit nga police station agud mahatagan sang nagakaigo nga proteksyon.
