ILOILO CITY – Ginkalipay sang Police Regional Office (PRO) 6 ang pahayag ni Presidente Rodrigo Duterte nga iya i-designar bilang Philippine National Police (PNP) Chief si OIC-PNP Chief Pol Lt General Archie Francis Gamboa.
Sa interview sang Bombo Radyo kay PBGen Rene Pamuspusan, director sang PRO 6, iya ginpahayag ang apresasyon kag kalipay bangud madugay man ang ila ginhulat antes matumod kun sin-o na ang masunod nga lider sang kapulisan kasunod kay anay PNP chief Oscar Albayalde.
Dugang pa ni Pamuspusan, nagasalig siya kay Gamboa bangod nakita man niya ang performance sini bilang OIC.
Suno kay Pamuspusan, sigurado gid nga dal-on ni Gamboa ang bilog nga organisasyon sang kapulisan sa dalan nga nagakadapat kag luyag ni Duterte.
Kaangot naman sa mga proyekto ni Gamboa, suno kay Pamuspusan, nangin compliant gid ang PRO 6 halin sa internal cleansing, body mass index, lakip na ang kampanya batok sa iligal nga droga.
Lauman suno sa natungdan nga magapadayon pa ang ini nga maayo nga performance.
