ILOILO CITY – Ginapakamalaot sang Police Regional Office 6 ang isa ka pulis nga nagpalusot sang ilimnon sa checkpoint sa Brgy. Cabugao Sur, Sta. Barbara, Iloilo.
Madumduman nga nadakpan si Police Staff Sergeant Paul Pinggoy, assigned sa Regional Intelligence Division sang Police Regional Office 6, matapos natukiban nga nagpalusot sang 29 ka karton sang long neck nga whisky kun sa diin una nga ginpahayag sang pulis nga tiles ang karga sang iya salakyan.
Sa interview sang Bombo Radyo kay Pol. Lt. Col Gilbert Gorero, Acting Public Information Officer sang Police Regional Office 6, iya ginpahayag nga napasakaan na sang kaso ang nasambit nga pulis kag magapangatubang pa sang dugang nga kaso administratibo nga ipasaka mismo sang Police Regional Office 6.
Gindayaw man sang natungdan ang mga pulis nga yara sa quarantine checkpoint bangud sa ila nangin performance kag nagalaum nga mangin leksyon kun tani sa tanan ang pagdakop sa nasambit nga pulis.
