ILOILO CITY – Magapadayon ang imbestigasyon sang Philippine National Police(PNP) tuhoy sa ginapahayag pagpahog sa organizer sang Katilingban sang Imol sa Syudad (KAISOG) sa Brgy. Bitoon, Jaro, Iloilo City.
Ini ang kasunod sang pagpadulong sang nagpakilala nga sanday Art Diaz, agent sang National Bureau of Investigation (NBI) kag Rey Gomez, agent sang Philippine Army, sa balay ni KAISOG organizer Wilfredo Panuela sa nasambit nga lugar.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office (PRO) 6, iya ginpahayag nga ila gid hibaluon ang matuod nga identity nanday Diaz kag Gomez ilabi pa nga lunsay ginpanginwala sang NBI kag Philippine Army nga empleyado nila ang duha.
Ginpahayag ni Malong nga santo sa ila initial investigation, mismo si Panuela ang nakakilala nga mga intelligence operative sanday Diaz kag Gomez.
Bangud nga nagsinggit si Panuela sang ginpadulungan nanday Diaz kag Gomez sa ila balay, nagtuga ini sang kahangawa sa mga kasilingan.
Ang mga kasilingan na mismo ni Panuela ang nagtawag sa mga Brgy. Official nga may yara sang kinagamo nga natabo sa nasambit nga lugar rason nga na-blotter ang hitabo.
Sa pihak sini, ginpahayag ni Malong nga indi man madakop ang duha ka persona bangud nga wala man sang krimen nga natabo kag wala man sang pamatuod nga may yara sila sang dala nga armas-luthang sang nagpadulong sa balay ni Panuela.
