Magapatuman sang imbestigasyon ang Police Regional Office 6 (PRO 6) sa ginapahayag pagpangkastigo sang kapulisan sa isa sa apat ka mga ginatudlo suspek sa pagpatay sa 18-anyos nga lalaki sa Brgy. Taal, Molo, Iloilo City.
Ang isa sa mga suspek nga ginapahayag nga ginkastigo amo si Ryan Kent ‘RK’ Magbanua, residente sang Barangay Calumpang, Molo, Iloilo City.
Ang biktima naman sa insidente amo si John Chris Mark Gapol, residente sang Barangay Calumpang, Molo, Iloilo City.
Sa interview sang Bombo Radyo kay Police Brigadier General Jack Wanky, Director sang Police Regional Office 6, iya ginpahayag nga kinahanglan mahatagan sang hustisya ang pagpatay sa 18-anyos nga si Gapol kon mapatud-an nga may kasal-anan ang ginatudlo mga suspek.
Suno kay Wanky, indi gid bmalikawan nga mabalikan sang complaint ang kapulisan sa pagkapot sang kaso.
Nagpasalig man ini nga padalman sa pag-imbestigar ang bahin sang ginapahayag pagkastigo sang mga pulis kay RK.
Kon mapamatud-an, kinahanglan mangin liable ang pulis sa legal nga kasuguan.
Nagapati man si Wanky nga wala sang rason agud nga kastiguhon sang may otoridad ang sin-o man nga nagapangatubang sa legal nga panumbungon.
Nagpasalig man ang natungdan nga busision ang mga ebidensya antes magpatuman sang nagakaigo nga tikang batok sa mga suspek.
