ILOILO CITY – Naalarma mangin si Police Regional Office 6 (PRO-6) director Chief Supt. John Bulalacao sa asud-asud nga pag-atake sang riding-in-tandem.
Sa interview sang Bmbo Radyo, ginpahayag ni Bulalacao nga iya man ginasundan ang magkasunod nga kaso sang pagpangluthang-patay sa Iloilo Terminal Market ukon Super kag distrito sang La Paz.
Adlaw-adlaw siya nagapakig-angot suno sa PRO-6 director, sa hepe sang Police Station No. 1 nga si Supt. Jonathan Pablito, angot sa pagpatay sa negosyante sang itlog sang pugo nga si Ranny Bebanco.
May mga person of interest na ang kapulisan sa pagpatay kay Bebanco suno kay Bulalacao.
Wala naangot sa iligal nga droga ang biktima suno sa opisyal apang may ginasundan na sila nga anggulo nga mahimo makahatag sang solusyon sa kaso suno pa kay Bulalacao.
Nagapati man si Bulalacao nga may kaangtanan sa iligal nga aktibidad ang pagpatay sa tricycle driver nga si Ely Tipanan.
Ginpahayag ni Bulalacao sa interview sang Bombo Radyo nga maathag nga naangot si Tipanan sa nagkalain-lain nga kaso.
Mahimo suno sa PRO-6 director nga ginbalikan ini sang iya mga naagrabyado.
Sa pihak sini, ginpasalig ni Bulalacao nga imbestigaran ang insidente.
Si Tipanan ang may record na sang pagpangawat kag no. 8 most wanted person sa distrito sang La Paz sang nagligad nga tuig.
Ginkumpirma man ni S/Insp. Jose Val Ladublan, hepe sang La Paz Police Station, nga yara sa drug watchlist ang biktima kag ila ini ginapaidalom sa surveillance.