ILOILO – Indi matuod nga may yara sang mandu si Presidente Rodrigo Duterte sa Criminal Investigation and Detection Group (CIDG) nga patyon ang mag-amay nga sanday Iloilo 1st District Congressman Richard Garin kag Guimbal Mayor Oscar Garin.
Ini ang nangin pahayag ni PRO 6 Director Police Brigadier Gen. John Bulalacao.
Sa interview sang Bombo Radyo kay Bulalacao, iya ginpahayag nga ‘fake news’ ang naga guwa nga impormasyon tuhoy sa ginapahayag ‘assasination’ nga ginmandu sang Presidente.
Indi lamang mahangpan ni Bulalacao kun ano ang motibo sa pagpalapta sang sala nga impormasyon.
Mahimo suno sa iya nga mismo ang Garin ang naghimo-himo sang istorya agud nga makakuha sang seguridad gikan sa mga pulis.
Nagapati man si Bulalacao nga uyang lang sa oras kun imbestigahan pa ang nasambit nga impormasyon.
Apang bangud nga nagapangayo sang bulig ang mga Garin, tinguhaan na lang niya nga manduan ang mga pulis nga imbestigahan ang mga nagalapta nga istorya.
Nahibaluan nga ginkuhaan sang mga armas kag security personnel ang mag-amay nga Garin bangud sa pagsapote kay Police Staff Sergeant Federico Macaya Jr. sang Guimbal Municipal Police Station.
