Naghatag sang direktiba ang Police Regional Office (PRO) 6 sa Regional Civil Security Unit (RCSU) 6 nga inspeksyonun sang maid-id ang mga naga-apply nga security guard.
Suno kay PRO 6 Director Police Brigadier General Josefino Ligan, dapat mangin strikto ang opisina sang RCSU 6 sa pag-monitor sang mga security agency nga naga-hire sang mga security guards.
Ini agud masiguro nga wala na sang kaangay nga insidente sa isa ka mall sa Mandurriao ang magluntad kun sa diin isa ka tawo ang ginluthang sang security guard.
Pahayag niya, bag-o hatagan sang permit ukon licensya ang isa ka indibidwal nga naga-apply sang trabaho bilang security guard, ipaidalum ini anay sa neuropsychiatric examination kag dapat may yara sang background investigation.
Ginpahayag man sini nga nagapatigayon naman sang maid-id nga imbestigasyon ang sa Iloilo City Police Office (ICPO) sa natabo nga pagpangluthang sa Festive Walk Mall kasunod man sa direktiba ni Iloilo City Mayor Raisa Treñas.
Dugang man sini nga sa bahin sang mga mall nga naga-hire sang security guard nga siguraduhon sang mga ini nga ang ila ginakuha ang halin sa mga lehitimo nga security agencies.
Madumduman nga subong nga tuig sang 2026, duha na sang kaso sang pagpangluthang ang nagluntad kun sa diin sa banwa sang Pavia natabo sang bulan sang Abril kag kasunod naman ini ang sa sulod sang isa ka mall sa distrito sang Mandurriao kun sa diin ang suspek lunsay mga security guard.
