Naka-heightened alert ang kapulisan sa Western Visayas para sa ano man nga posible matabo kasunod sang pag-aresto kay anay Presidente Duterte kag pagdala sa iya sa The Hague, Netherlands bangud sa ginaalegar nga crimes against humanity nga nakumiter sini sang tion sang iya drug war.
Sa interview sang Bombo Radoy kay Police Brigadier General Jack Wanky, director sang Police Regional Office 6, iya ginpahayag nga ginalantaw nila ang posibilidad nga hingalitan sang iban nga mga grupo ang sitwasyon subong sa Pilipinas agud magsabwag sang kalakasan gani dapat handa diri ang kapulisan.
Suno kay Wanky, hugot man ang ila monitoring sa posible matabo nga convergence sang mga tawo nga magapatigayon sang dako nga hublag-protesta apang sa subong, wala pa sila sang intel report nahanungod diri.
Gin-athag naman ni Wanky nga wala man sang dapat nga ikaalarma ang publiko.
