Liwat nga nagpakita sang maayo nga performance ang Police Regional Office 6 matapos makuha sini ang pinakamataas nga ranggo sa bug-os nga pungsod sa ila kampanya batok sa krimen.
Base sa operational performance evaluation sang Philippine National Police humalin Hunyo 1 tubtob 13, nangin numero uno ang PRO6 sa bug-os nga pungsod sa kampanya batok sa illegal logging.
Ini matapos makapatigayon sang 77 ka operasyon kag makadakop sang 33 ka indibidwal.
Nangin numero uno man ang rehiyon sa bug-os nga pungsod sa pagkasakmit sang shabu kag nagranggo nga ikaduha sa anti-smuggling operations matapos makapahigayon sang 268 ka operasyon sa sulod sang amo nga panahon sang ebalwasyon.
Nagpakita man sang mayo nga resulta ang rehiyon sa kampanya batok sa illegal fishing, kag nagranggo nga ikaduha sa pungsod sa kadamuon sang nadakpan nga mga lumalapaw sa kasuguan, nga nag-abot sa 122 ka violators.
Nakakumpiskar man ang mga iligal nga kagamitan nga may kaangtanan sa pagpangisda nga nagabalor sang ginabanta ₱6.38 milyon—ang pinakamataas nga balor nga narekord sa bug-os nga pungsod. | pinaagi kay Ryan Lesigues
